التاج

رانيا ويامن بعتولي تاج

وانا بقالي طن وقت ما كتبتش ووالله الكتابة وحشتني بس كان في شوية حاجات كده ممكن أحكيها بعدين

المهم

التاج كالآتي

احب شخص لقلبك في الدنيا؟

"منى"

اللي دايما بدعي ربنا يحفظ مكانتها دي في قلبي

انسان مستعد تضحي بحياتك عشانه؟

والله هو فيه كتير بس لازم يكون الموقف سخن بما فيه الكفاية عشان الاحداث تيجي بالتصاعد الكافي بمنتهى البساطة لازم الوضع يكون دراماتيكي بما يكفي

وان كان في ناس أنا مستعد أموت وراهم مش بس أضحي عشانهم "هما للأمانة مش كتير"

انسان كرهته لدرجة الجنون وتمنيت لو تمسك سكينة وتنقض عليه وتغرزها في قلبه تقتله وتقف تبص لجثته و تشفي غليل قلبك؟

بصراحة مش حاضرني حد دلوقتي غير الناس بتوع الاغتصابات اللي في الأقسام

ما هو اسم اجمل كتاب كتبه بشر قراته ومحتفظ به حتي الان؟

لأ أجمل في الكتب زي المقارنة ما بين الفواكه والخضار واللحوم يعني ما تنفعش

في كتب أثرت فيا جدا "زي الجريمة والعقاب" و"ساحر الصحراء" والدون الهاديء"و"حلاج صلاح عبد الصبور" والملحمة الاسلامية الكبرى" وكتييير قوي كتب عايشه جوايا

اسم كتاب كتبه بشر انت متعلق بيه وبتقراه كل فترة؟

بصراحة ما يش حاجة بقراها كل فترة بس بحس اني أحيانا باحتاج اقرا شوفية في كتاب"والموعد الله"بتاع خاد محمد خالد
أو أبص في قصايد "زهو المدار"بتاعت البرجيني

اهم جهاز منزلي انت متعلق بيه او بتستخدمه كتير؟

الحاسوب

شئ تحس بالراحة النفسية عندما تنظر اليه؟

السما ...يالذات في الساحل الشمالي

والقمر لما يكون بدر

والنيل في الروضة

وعيون منى لما تكون مبسوطة

وضحكة حامد اللي أحيانا بتكون فيها نوع مميز من العبقرية البلهاء

ومنظر يامن وهو بيهرج وياااه حاجات كتيرقوي

تخيلوا أنا بجد حاسس بامتنان كبير لكل حاجة حلوة ربنا ادهالي

مكان تحس فيه بالحنين الي شئ لا تدري ما هو وذكريات جارفة الي لاشئ؟

مكة حيث تنظر الى كل شيء وتشعر كل شيء بالذات في حجر اسماعيل

تعرفوا من أعز أحلامي اني أروح هناك تاني

مكان تحس بالراحة عندما تدخله؟

لو في مصر يبقى مسجد السلطان حسن

ومعظم المساجد

وبيت أهل منى

وغرفة نادي

والصالة عند يامن

وأكيد الأوبرا
والحتة اللي تحت الكوبري في الساقية

اجمل مدينة زرتها في مصر؟

القاهرة بكل ما لها وما عليها

وبعديها طنطا الحبيبة
ثم الاسكندرية

اجمل مكان طبيعي رايته داخل مصر؟

البحر في مرسى مطروح
والصحرا البيضا في الفرافرة
والنيل في جزيرة الروضة

شخصية كارتونية بتحبها؟

المشكلة اني مهووس بالكارتون

ففي كتير قوي بس خلينا نقول عموما شخصيات x-men وبالذات NightcrawlerوWolveriene

نوع هاتفك المحمول؟

Samsung X-100 أسوأ محمول على الاطلاق

سرعة بروسيسور جهازك؟

2.6 جيجا هرتز

حجم ذاكرة هارد جهازك؟

80 جيجا بايت

اهم هدف انت واضعه لحياتك دلوقتي؟

أتجوز وأحقق علاقة أسرية طيبة مع زوجتي ومع ربنا

مواصفات فتاة الاحلام بالنسبة لك؟

مفيش فتاة أحلام في فتاة واقع ودي أكيد أجمل بالنسبة لي من كل حلم

صف شعورك لما بتسمع كلمة مصر؟

بحس بمرارة لازعة جدا ورغبة في اني أنجح فيها برغم كل الصعاب ربنا يفك أسرك يا مصر

شعورك لما بتسمع كلام عن اليهود؟

بافتكر سالومي والحبيب زكريا بن يحي عليه السلام

شعورك لما بتشوف الكناس العجوز في الشارع؟

بافتكر سيدنا النبي لما كان بيدعي ربنا انه يحشروا مع الناس اللي زي الكناس ده

لون الجورب المفضل؟

ايه ده هو الناس بتنقي الحاجات دي

بكل تأكيد الجورب المفضل هوا المرمي بجوار الحذاء ولو مافيش يبقى ما فيش مشكلة

احساسك اذا داست قدمك في الطريق علي مخلفات حيوان؟

سعادة مريعة ورغبة في التقيوء الوجودي

تتوقعوا ايه الله يسامحكم

افكارك تجاه شاب ماشي في الطريق يلبس جلابية بيضا قصيرة وعمامة وله لحية وبجيبه السواك؟


بصراحة بحس بحب واتمنى ان ربنا يكون مصلحلوا جميع نواحي حياته

احساس يراودك في اشارة مرور مغلقة بسبب مسئول كبير؟

القرف والخنقة

امرر التاج ده لميييييين؟

لغادة مع نفسها

ودندنة

وكاريكاطز